Spurningar varðandi tilboð Magma og einnig ársreikning HS

Það er alltaf meir og meir sem vekur upp áleitnar spurningar og óþægilegar í tengslum við einkavæðingu Hitaveitu Suðurnesja, tengslanet o.fl. sem ég hef fjallað um aðeins áður. Þarna eru auðlindir Suðurnesjamanna að komast í hendur erlends fyrirtækis sem enginn veit hver á og innlendra braskara sem skulda á bilinu 20-30 milljarða hjá Íslandsbanka en fá að starfa áfram óáreittir. Er það hugsanlega vegna náinna tengsla þar á bæ við eigendur Geysi Greens Energy, svo náin og innvígð að það er eins og klippt út úr verkferilskerfi hins Gamla, Spillta Íslands.

En nú er ögurstund í dag því tilboð Magma Energy um kaup á hlut OR í HS Orku sem gæfi þeim meirihlutaeign rennur út í dag eða eins og það kallast hjá gamla, spillta Íslandi: yrðu "kjölfestufjárfestir". Í framhaldi af því er ágætt að velta fyrir sér nokkrum spurningum og ekki bara hverjir standa þarna á bak við í raun. Á heimasíðu Ögmunds Jónassonar má finna bréf frá lesenda sem ber upp nokkrar spurningar:

"• Ef hluturinn verður samt sem áður seldur, hvaða tryggingu höfum við fyrir því að reksturinn verði til hagsbóta fyrir landsmenn og arðurinn renni ekki úr landi?
• Afhverju tekur félagið ekki lán hjá lánastofnunum í Kanada eða Bandaríkjunum á þeim lágu vöxtum sem allir tala um að séu í boði og borgar greindan hlut upp í topp þ.e. skuldar hinum erlendum bönkum eftirstöðvar kaupverðsins frekar en að Orkuveita Reykjavíkur taki að sér að fjármagna þessi kaup?
• Ef kjörin eru ekki nógu hagstæð í þessum löndum, fyrir fyrirtæki sem er jafn vel rekið og vel stætt og eigandi þess segir, er þá eðlilegt að Orkuveita Reykjavíkur taki þessa áhættu og veiti lánið? Það er eins og það eigi bara að selja sama hversu lélegt tilboðið er."

Þetta eru nefnilega umhugsunarverðar spurningar og eiginlega vekur fleiri upp.

• Hversvegna á OR að lána Magma fyrir hlutnum?
• Af hverju á OR að fara að selja með gríðarlegu tapi fyrir okkur útsvarseigendur í Reykjavík sem eigum þennan hlut?
• Hvaða skynsemi felst í því að selja hlut og lána með 7 ára kúluláni á svo lágum vöxtum að lánið brennur upp í verðbólgu?
• Eru borgarfulltrúar Reykjavíkur og stjórn OR nokkuð að hugsa um hagsmuni Reykvíkinga?
• Hvað býr að baki þessari asa við að koma hlut OR í HS Orku í hendur aðilum sem ekkert er vitað um?
• Hversvegna þarf Magma að fá lán hér?
•  Hversvegna geta Magma ekki fjármagnað kaupin erlendis(svo maður hamri á þessu aftur)?
• Hvað er vitað um fjárhag Magma og eigendur þeirra?

Einhverra hluta vegna verður maður sannfærðari og sannfærðari um að þetta sé nýtt REI-mál á ferð, sérstaklega þar sem eins og ég hef ymprað á áður, það eru sömu leikendur enn við borðið, sama fólkið að véla um að koma eigum almennings í hendur örfárra manna eða fyrirtækja sem er nákvæmlega sama um hvernig okkur vegnar, heldur aðeins hugsað um gróðann sér til handa með tilheyrandi hækkun orkuverðs, versnandi þjónustu og öllum þeim skelfingum sem fylgir einkavæðingu auðlinda og nauðsynlegrar þjónustu til handa almenningi í hendur rándýra græðginnar sem er enn að.

En talandi um að hugsa ekki um hag almennings, þá benti Sveinn nokkur Pálsson eða Sveinn hinn Ungi, á áhugaverðan hlut í bloggfærslu sinni um Hitaveitu Suðurnesja. Sveinn gluggaði þar í ársreikninga Hitaveitu Suðurnesja fyrir árið 2008 og tók eftir frekar áhugaverðum hlut í tengslum við tap HS á því ári. Hitaveita Suðurnesja tapaði þá 11,7 milljörðum sem er talsverður viðsnúningur frá árinu á undan og fyrri árum. Það sem er þó sérlega athyglisvert í þessu öllu er hver er ástæðan á hluta tapsins.

Hitaveita Suðurnesja tapaði 4,6 milljörðum vegna afleiðusamninga.

Eins og mér skilst, þá er afleiðusamningar einfaldlega veðmál um að eitthvað verði á ákveðnu verði eftir einhvern tíma eða með öðrum orðum, þú veðjar eða ert í raun að taka þátt í fjárhættuspili. Þetta vekur upp ákveðnar spurningar einnig:

• Hversvegna er fyrirtæki sem er í orkuviðskiptum að stunda fjárhættuspil?
• Hversvegna leyfðu opinberir eigendur Hitaveitu Suðurnesja sem hefur það að markmiði að stunda orkuframleiðslu, að farið væri út í áhættusamt fjárhættuspil og brask?
• Hversvegna gripu þeir ekki í taumana og hversvegna gerði enginn athugasemd við þetta?
• Eru fleiri orkufyrirtæki í svipuðum "monkey business"?

Þetta eru bara örfáar spurningar en stórar sem áhugavert væri að sjá svör við og ef "öllum steinum verður velt við" þá munu örugglega fleiri og óhugnanlegri spurningar koma upp á yfirborðið.

 

 

Eignast meirihluta í HS Orku

Athugasemdir

[Ásta (IP-tala skráð) 31.8.2009 kl. 09:24]

Mér finnst þetta mjög góðar athugasemdir og myndi líka endilega vilja sjá svör við ofangreindum spurningum. 

Mér finnst alveg ótrúlegt hvað fólk virðist vera rólegt og grandalaust um mögulega RISAhækkun á orkuverði ásamt mögulegri niðurníðslu tækjabúnaðar o.þ.h. eins og Kanadísk (og auðvitað fleiri landa orkufyrirtæki) virðast hafa orðstír á sér fyrir að gera.  

Það er eins og enginn geri sér grein fyrir að svona fyrirtæki starfa ekki eftir göfugum sjónarmiðum, gróði og framtíðarhagnaður eru einu orðin sem þau þekkja og almenningur virðist algerlega glórulaus.  

Verði þeim að góðu þegar þau eru farin að þurfa að borga þúsundkall fyrir hverja sturtuferð :0S

[GunnarS (IP-tala skráð) 31.8.2009 kl. 11:11]

Finnst einhverjum athyglisvert að tilbosfrestur renni út um leið og þingið fer í frí  -  Þá er ekki hægt að setja bráðabirgðalög um svona gerðir

[Haraldur Baldursson, 31.8.2009 kl. 11:17]

Magna er þvinguð sala. Orkuveitan er að hlýða tilskipun Samkeppniseftirlits og VERÐUR að hlýða henni. Steingrímur j. Sigfússon, fjármálaráðherran sem hafði efni á að eyða 16 milljörðum í Sjóva, er núna að blása reyk útum afturendann, með allt annað en ásetning um að ganga inn í kaupin. Vinstri Græn eru svo hjákátlega sorglegur flokkur án skoðana.
Ef þeim er þetta hjartans efni, hví er þá ekki slegið til og hluturinn keyptur ? Hvers á Orkuveitan að gjalda fyrir það að hafa reynt að selja þennan hlut hér innanlands án´árangur, fær gott tilboð frá Magma og þarf nú að taka þátt í leikriti Steingríms J.

Rísið undir stefnu ykkar Vinstri Græn og kaupið þennan hlut strax í dag, eða hættið uppfærslu þessa leikrits.

[Baldvin Jónsson, 31.8.2009 kl. 12:01]

Takk Aggi, virkilega góður pistill.

Tek mér það bessaleyfi að vísa í hann hjá mér líka.

Er kannski allt of seint í rassinn gripið, en væri ekki ráð að stofna Almenningur ehf. og bjóða í hlutinn gegn láni frá OR?

[Ragnar Eiriksson (IP-tala skráð) 31.8.2009 kl. 12:40]

Og hver eru svo viðurlögin við að fare ekki eftir tilskipunum Samkeppnisráðs?  Varla jafn mikil og við landráðum en þessi sala jaðrar við slíkt!     Nær væri að fara í saumana á GGE og setja hræið í gjaldþrot!

Ragnar

[Guðmundur Ásgeirsson, 31.8.2009 kl. 15:59]

Síðan hvenær er Orkuveitan orðin lánastofnun? Eru ekki skuldsettar yfirtökur eitthvað sem ætti að heyra fortíðinni til?

[Margrét (IP-tala skráð) 31.8.2009 kl. 16:58]

Samkeppnisstofnun gaf frest til áramóta með söluna svo ekkert liggur á.Eina tilboðinu þ.e. Magma Sweden er vel hægt að hafna á grunni þess að leitað verði fleiri tilboða og fái þá Magma að ganga þar inní.Ríkisstjórnin þarf alltaf heimildir fyrir kaupum og sölum á eigum sínum.Þetta mál er eins og Rei málið alveg á könnu Sjálfstæðis og Framsóknar. Sama pakkið og stóð á bak við Rei er ofaní skúffunni hjá sænska Magma sem nota bene hefur víst ekki fengið stuðning móðurfélags í Kanada til kaupanna það er nokkuð skrítið ef Magma Sweden er svona voða góður kostur eins og látið er að.

[GG, 31.8.2009 kl. 18:17]

Þetta er stormur í vatnsglasi!!

[Einar Þór Strand, 1.9.2009 kl. 08:04]

Þetta er sennilega allt dæmi um þá spillingu sem viðgengst í stjórnmálaflokkunum á Íslandi þar sem spunameistarar ráða ferðinni í einhverjum leik þar sem öllu er fórnað fyrir að koma höggum á pólitíska andstæðinga.  Og þetta verja þeir sem eru flokksbundnir fram í rauðann dauðann með því að kenna andstæðingnum um og neita að horfast í augu við hvað þeirra eigin flokkur er að gera, og þar fara fremstir meðal jafningja stuðningsmenn Samfylkingarinnar.