Færsluflokkur: Bloggar

Farinn með bloggið annað

Hef ákveðið að færa skrif mín annað vegna dráps náhirðarinnar á Morgunblaðinu sem trúverðugum fjölmiðli. Mun allavega um tíma rita bloggfærslur á þessum stað:

http://agnark.wordpress.com/

Bið ykkur vel að lifa.


Beinar aðgerðir gegn áróðursriti hrunvaldsins mikla: Morgunblaðinu

Þar sem Morgunblaðið hefur orðið að áróðursmiðli fyrir þá sem settu þjóð vora á hausinn, náhirðararm Sjálfstæðisflokksins sem inniheldur nokkur mestu fól Íslandssögunnar og er kennd við hinn nýja ritstjóra Morgunblaðsins sem ber hvað mesta ábyrgð á efnahagshruninu. Samviska flestra getur varla að boðið upp á fátt annað en að grípa til einhverra aðgerða gegn þessum dána fjölmiðli sem risið hefur upp sem áróðursrit í anda Pravda, Fox News og Der Sturmer, því varla vill fólk halda áfram að styðja við bakið á þeim sem orsökuðu gríðarlegar byrðar á bak þeirra(og þá erum við ekki bara að tala um gjaldþrot Seðlabankans og afskriftir til handa Árvakri).

Hérna eru nokkur ráð til fólks um hvað skal gera og er ágætt ef fleiri koma þessum skilaboðum til ættingja og vina:

  • Segið áskrift á Morgunblaðinu upp. Hringið  í 569-1100 eða sendið póst á askrift@mbl.is. Þið sparið pening á þessu sem nýtist í margt betra svosem niðurgreiðsla hækkandi reikninga, þökk sé hinum nýja ritstjóra Morgunblaðsins.
  • Hættið að skoða mbl.is. Vefurinn verður verðminni í augum auglýsenda og auk þess verður ekkert að marka fréttir þaðan, enda skrifaðar fyrst og fremst með hagsmuni Sjálfstæðisflokksins og náhirðarinnar í huga.
  • Hættið að blogga á mbl.is-Í hvert sinn sem þið bloggið og einhver skoðar, þá sýnir það aðsókn sem telur þegar kemur að vinsældum vefjar. Það gerir áróðurssíðunni kleift að selja auglýsingar, peningar sem nýtast við það starf að koma óvinum íslensku þjóðarinnar til valda á ný í gegnum áróður Morgunblaðsins.
  • Hættið að skipta við fyrirtæk(ef þið komist hjá þvi) sem auglýsa í morgunblaðinu. Þið sendið ákveðin skilaboð til þeirra, að þið viljið ekki versla við fyrirtæki sem auglýsa hjá miðlum sem ástunda áróður fyrir náhirð Davíðs Oddsonar sem færði okkur miklar hörmungar. Það gerir Mogga-ósómanum enn erfiðara fyrir vik til að réttlæta veru þessa þjóðníðings á ritstjórastól.
  • Hundsið blaðamenn Morgunblaðins-Þetta eru ekki "blaðamenn" heldur eru þetta starfsmenn Sjálfstæðisflokksins og náhirðarinnar fyrst og fremst. Allar upplýsingar sem þið veitið þeim, eru nýttar í pólitískum tilgangi og valdatafli og gætu nýst gegn ykkur eða fyrirtækjum ykkar sem Davíð Oddsyni er illa við. Einnig er hugsanlegt að þessar upplýsingar rati til þeirra sem eru í náðinni hjá honum og hans fólki.
  • Hættið að senda fréttatilkynningar til Morgunblaðsin og annað slíkt. Þannig hafa þeir ekkert til að segja frá eða gera sér mat úr.Skerið á allt upplýsingaflæði og hundsið þá.
  • Sendið póst á þingmenn og ráðherra með kröfum um að rannsakað verði hvernig salan á Árvakri kom fram, sérstaklega þar sem ákveðið var að ganga framhjá aðilum sem tilbúnir voru til þess að greiða allar skuldir en gengið til samninga við innvígða Sjálfstæðismenn og 3-4 milljarðar afskrifaðir yfir á breitt bak almennings.

Ég vona að þið sem ábyrgir þjóðfélagsþegnar og fórnarlömb hrunsins, sýnið að þið séuð búin að fá nóg af hrunvaldinum Davíð Oddsyni og náhirð hans sem telur m.a. Kjartan Gunnarsson IceSave-kóng, og grípið til einhverra aðgerða. Sýnið að þið séuð ábyrgir neytendur sem sættið ykkur ekki við að mönnum sem hafa gert þjóð vora gjaldþrota, sé hleypt í valdastóla á ný og leyft að fara fram með hermdarverkum á nýjan leik gegn íslensku samfélagi.

Ykkar er valdið, ykkar er valið og ykkar er samviskan. Sjálfur hef ég hætt að nota mbl.is sem fjölmiðil enda ekki trúverðugur sem slíkur og ætla að færa mitt blogg eitthvert annað. Þetta er því mitt loka-orð fyrir utan tilkynningu síðar, á þessum vettvangi og þakka ég flestum fyrir samveruna og skoðanaskipti, með von um að flestir sjái sér fært að flýja þetta svæði um aldur og ævi, ef hrunvaldurinn mikli verður festur hér til eilífðar á krossinum sínum í afneitun.

Adios.


Dagurinn sem Morgunblaðið dó sem fjölmiðill og reis upp sem áróðursrit hrunvalda

Dagurinn í dag, 24. September 2009, er sögulegur dagur. Í dag kemur maður til starfa sem ritstjóri dagblaðs, maður sem setti heila þjóð á hausinn og iðrast ekki neins, maður sem öll íslenska þjóðin þarf að blæða fyrir á einn eða annan hátt. Þessi maður skapaði hér samfélag græðgi, innleiddi hér spillingu sem grunnstoð samfélagsins, sleppti rándýrum og hrægömmum lausum gegn varnarlausri þjóð sem í einfeldni sinni trúði lygum þessa manns og félaga hans í Sjálfstæðisflokknum, flokknum sem keyrði í ákafri fylgispekt við þennan sama mann, íslenskt samfélag fram af klettabrún niður í hyldýpi gjaldþrots, fátæktar, atvinnumissis, eignamissis og myrkrar, skuldugar framtíðar.

Í dag er sögulegur dagur, því til starfa tekur maður að nafni Davíð Oddson sem gerði heilan Seðlabanka gjaldþrota og velti mörg hundruð milljörðum á bak okkar, maður sem gaf vinum sínum banka sem setti landið á hausinn, maður sem lét ráða vini sína og ættingja sem Hæstaréttadómara og son sinn sem héraðsdómara, maður sem lagði niður heila stofnun vegna þess að honum mislíkaði þjóðhagsspá, maður sem innleiddi hótanir og ofsóknir inn í stjórnkerfið og maður sem síðast en ekki síst, er einn af stærstu orsakavöldum hrunsins sem ég, þú, börnin, barnabörn og aðrir þurfa að borga. Þetta er maðurinn sem lagði grunninn að og tók þátt í að rjúfa samfélagssáttmálann án nokkrar iðrunar og þetta er maðurinn sem við vorum látin blæða fyrir 3-4 milljarða í afskriftir .

Í dag er dagurinn sem samviskulaus, firrtur maður sem skapaði helvíti fyrir vora þjóð, var ráðinn til starfa á Morgunblaðinu. Í dag er dagurinn sem eigendur Morgunblaðsins kveiktu í blaðinu sem fjölmiðil, gerðu hann að ómarktækum salernispappír lyga, hálfsannleika einhliða flokksblaðs, og reistu úr ösku þess áróðursmiðil fyrir kvótagreifa, auðmenn, Sjálfstæðismenn og aðra þá sem hatast við þjóðina, í anda Pravda og Der Stumer. Í dag er dagurinn sem heill fjölmiðill var gerður að Postulínsturni hrunvalds, honum, náhirð hans, trúflokki og rökkum sínum til misnotkunar.

Í dag er dagurinn sem eigendur Morgunblaðsins vörpuðu grímunni og lýstu yfir styrjöld gegn þjóðinni í landinu, áróðurstyrjöld um að koma til valda á ný hrunvöldum harðlínuafla Sjálfstæðisflokks, áróðursstyrjöld til að tryggja eignarhald kvótagreifa, áróðurstyrjöld til að hindra og koma í veg fyrir rannsókn á hruninu og alvöru uppgjöri á því.

En í dag er líka dagurinn sem við getum gert eitthvað í málunum gegn þeim sem skipulega ráku starfsfólk sem var með rangar skoðanir, í dag getum við gert eitthvað í málunum gagnvart þeim sem drápu Moggann sem fjölmiðil og gerðu hann að áróðursmiðli sem ekki mun segja nokkuð satt orð í framtíðinni, í dag getum við risið upp og sýnt að við látum ekki hrækja á okkur lengur af þeim sem fengu milljarða í afskriftir svo hægt væri að koma hrunvaldinum mikla fyrir í þægilegum stól. Þó þeir sem ráði innan veggja Morgunblaðsins séu skyni skroppnir, iðrunarlausir og algjörlega lausir við samvisku, er hægt að koma þeim í skilning um að þeir gengu of langt og þetta sé eitthvað sem fólk sættir sig ekki við. Það er nefnilega ekki hægt að höfða til þeirra í gegnum skynsemi eða samvisku sem FL-okks og Foringjahollustan blindar bláum bjarma, en það er eitt sem þeir skilja og finna fyrir, það er tungumál peninganna.

Það sem ég legg til að við gerum öll sem viljum er eftirfarandi:

  • Segjum upp áskriftum að Morgunblaðinu, hvort sem það er fyrirtækjaáskrift eða einstaklingsáskrift.
  • Hættum að skoða mbl.is og hundsum fréttir þar. Þær verða hvort sem er ekki marktækar eftir þennan dag. Þeir sem vilja skoða blogg, farið frekar beint inn á blog.is og ekki fréttatengja blogg.
  • Ef við getum, beinum viðskiptum frá þeim fyrirtækjum sem auglýsa í Morgunblaðinu eða fréttum að auglýsi þar frá og með deginum í dag.
  • Drekkið stjórn Árvaks í tölvupóstum í mótmælaskyni, sendið póst á þingmenn og ráðherra og heimtið að það verði rannsakað hversvegna ákveðið var að afskrifa skuldir Árvaks þegar aðrir voru tilbúnir til þess að greiða þær að fullu.
  • Hugleiðið að loka bloggum ykkar og færa annað.

Sjálfur hef ég ákveðið að huga að brottför hér af Mogga-blogginu því ég ætla ekki að styðja við bakið á óvinum þjóðarinnar sem þetta blað leiða og eiga, heldur finna mér nýjan íverustað á næstunni, jafnvel taka þátt í að stofna nýtt bloggsvæði líkt og viðrað var við mig. Ég ætla einnig að vonast til þess að þeir fjölmiðlamenn sem eftir verða íhugi að það er betra að vera atvinnulaus en gólftuska þess fólks sem hörmungar yfir þjóðina kallaði og vona að þeir hafi rænu á að búa sér til nýjan fjölmiðil í staðinn, án yfirráða hinnar Bláu handar. Ég ætla svo sjálfur að gerast áskrifandi að DV til að tryggja að hér sé starfandi einn áskriftarfjölmiðill í blaðaformi áfram.

En að lokum, þá er eitt víst í dag, að eftir að hafa verið byrjaður að blómstra sem fjölmiðill að nýju, þá er Morgunblaðið dautt, grafið og allar fréttir lygar af þeirra hálfu. Ég óska ekki þeim sem eiga þetta blað né þeim sem því stýra neinna heilla heldur aðeins bölvunar, og vona að Mogginn hverfi í gleymsku sögunnar sem fyrst, þjóðinni til ánægju og bjartari framtíðar.


mbl.is Davíð og Haraldur ritstjórar
Tilkynna um óviðeigandi tengingu við frétt

Er hið Nýja Ísland andvana fætt?

Þegar búsáhaldabyltingunni lauk, þá leið manni eins og uppreisnarmönnum í lok Stjörnustríðs. Helstirni ríkistjórnarsamstarfsins hafið sprungið, Svarthöfðar Sjálfstæðisflokksins þeyttust á brott án nokkurrar ábyrgðar á hermdarverkum sínum á borð við IceSave eða mútugreiðslna vegna einkavinavæðingar á Hitaveitu Suðurnesja hvað þá bankanna. Baráttan stóð þó áfram um tíma þar sem Keisarinn sjálfur sat sem fastast í Seðlabankanum en varð þó að leggja á undanhald síðar, eftir hetjulega baráttu þeirra sem sáu að sér innan þings. Reyndar tókst þó öflum Keisarans þar á bæ að tefja nóg til að undanhaldið yrði sem sársaukafyllst fyrir þjóðina og náðu svo örlitlum hefndum með því að sjá til þess að þjóðin fengi ekki skýrt umboð til þess að búa til nýja samfélagssátt, hvað þá að auðlindir yrðu í þjóðareign.

Fyrsti sigurinn var í höfn en keisarinn og náhirð hans voru kænir líkt og er valdsjúkra manna háttur, háttur þeirra sem hafa blindast af valdahrokanum, siðblindunni og græðginni sem Fjórða Ríki Frjálshyggjunnar taldi sem dyggðir á meðan heiðarleiki, samviska og réttlæti öllum til handa voru lestir og annarlegar hvatir, sem ætti að berja út úr fólki með misnotkun valds og stjórnsýslu. Keisarinn og hirð hans nýtti tímann nefnilega vel og virðist hafa náð vopnum sínum á ný og stefnir að því að gera allt sem það getur til að ganga milli bols og höfuðs á fylgismönnum hins Nýja Íslands því samfélag með réttlæti, gagnsæi og von er eitthvað sem er andstætt allri hugmyndafræði Keisarans, náhirðar og yfirstéttar kvótagreifa, auðmanna, Viðskiptaráðs og bankaþrjóta sem Flokkinn eina dýrkar og verndar.

Einhvern veginn lítur sviðið út svona, fyrsta stóra orrustan um Nýtt 'Island er að tapast á meðan stuttbuxnastormsveitir og skilanefndir Svarthöfðanna, fara hamförum í að berja niður alla mótstöðu gegn Gamla, spillta Íslandi. Afskriftir til handa kvótagreifum og auðmönnum eru framkvæmdar með kennitöluflakki og velvild bankanna á meðan Intrum og innheimtudeildir bankanna ganga fram líkt og dauðasveitir gegn almenningi sem hefur orðið fyrir gríðarlegri kjaraskerðingu og eignamissi, þökk sé sömu banka- og auðmönnum, mönnum sem ganga í burtu frá milljarða skuldum og fá samt að kaupa sér 700 þúsund kr. sturtuhausa eins og ekkert sé. Bankaleynd er beitt eins og bjúgsverði gegn öllum þeim sem vilja upplýsa glæpi og spillingu og lítið sem ekkert er gert til þess að ná fram réttlæti gegn þeim sem hrunið orsökuðu, hvort sem það eru auðmenn, bankamenn eða yfir-Svarthöfði náhirðarinnar sem siðblindur færði okkur Ísþrælkun með illyrmislegt glott á vör og slaufu um hálsinn.

Því miður er það svo að þegar maður lítur á þetta og fleiri þætti á borð við fáar, ómarkvissar aðgerðir í þágu heimilanna og varla má minnast á afnám verðtryggingu, ekkert er gert til að rannsaka mútugreiðslur til Sjálfstæðisflokksins, orku-auðlindirnar gefnar til sænsks skúffufyrirtækis sem er í eigu dularfulls og vafasams fyrirtækis í Kanada vegna þess að gerspilltir gæðingar hrunflokkana hagnast á því, útrásarvíkingar á borð við Jón Ásgeir og Björgólf Thor eru stilkfríir  þegar kemur að yfirheyrslum, hvað þá að eignir þeirra og annarra slíkra séu frystar á meðan sólbrúnkustjarna frjálshyggjuarms Samfylkingarinnar tilkynnir að gengið verði fram af fullkomnu miskunnarleysi og hörku gegn námsmönnum og bótaþegum sem grunaðir eru um svindl á kerfinu. 

Einhvernvegin þá færist yfir mann svartnættið á ný bara þegar litið er á þetta en einnig á það hvernig samfélagið er að þróast á ný yfir í sama Gamla(Íslands) farið. Stjórnmálamenn, spunaliðar þeirra og flokksdindlar hafa fundið öryggi hornatuð landans og dramb síns á ný og með þeirri vissu um að samfélagið sé að verða rólegt og tilbúið undir þrældóm lénsveldis auðmanna náhirðar, valdaætta, S-hóps, úlfa og svína, fara þeir fram og segja með sama fyrirlitningartón og gjarn var hjá talsmönnum Fjórða Ríkis Frjálshyggjunnar, að við sem tilheyrum þeim undirmálslýð sem þrælar fyrir þeirra gnægtum, að almenningur eigi að halda kjafti, borga bara og láta sér nægja að það verður birt skýrsla fyrsta nóvember. Bannað sé að spyrja spurninga, velta upp steinum, skoða ormagryfjur og vera til vandræða fyrir yfirstéttina sem hefur Alþingi í vasa sínum, í gegnum prófkjör og  kosningasjóði, því þessi skýrsla inniheldur hina fullkomnu synda-aflausn til handa stjórnmálamönnum, ráðherrum og ráðaneytisstjóra sem seldi í Landsbankanum kortér í hrun, þetta verður aðeins símadömu á samskiptasviði SPRON að kenna miðað við fullvissuna sem skín frá flokksdindlum sem fær mann til að halda að niðurstöðurnar hafi verið ákveðnar, aðeins átti eftir að semja umgjörðina um þær.

Fjölmiðlarnir taka svo undir þennan söng, eyða mestu púðri í innihaldsrýrar dægurfréttir á borð við ástarmál Paris Hilton og Ronaldo eða sokkabuxur Þóru Tómasar, meðan umfjöllun um mikilvæg mál fer fyrir ofan garð og neðan, blaður stjórnmálamanna í Kastljósi er í sama gír og áður, ekkert er stuggað lengur við þeim sem bannað var að styggja fyrir hrun heldur herða þeir tökin enn harðar á fjölmiðlum sínum, reyna að koma a stað þeirri ríkisskoðun að landinn á að þrælka en ekki hugsa með álitsgjöfum sem allir segja það sama í kór:"Við eigum ekki að vera vond við útrásarvíkinganna, þeir voru svo voða, voða góðir við okkur" milli þess sem þeir tala um að allir eigi að vera rólegir, skýrslan eina sé málið..Sumir ganga jafnvel svo langt að reka þá sem hafa skoðanir ekki þeim að skapi eða flækjast fyrir náhirð Keisarans og veldi spillingarinnar sem um frjáslhyggjunna sveipast. Þá blaðamenn sem ekki er hægt að reka er svo ógnað með kærum í gegnum Fjármálaeftirlitið sem svaf viljandi á verðinum og leit undan geispandi þegar til þurfti, enda var því eingöngu ætlað að þjóna þeim sem markaðnum stjórnuðu, ekki þeim sem markaðurinn græddi á.

Og hvernig er umræðan? Hún er að færast í sömu skotgrafirnar, sömu flokkadrættina og pissukeppnina þar sem foringja- og flokksdýrkunin er að kaffæra öll rök sem gera það að verkum að það þykir í góðu lagi t.d. að gefa auðlindir þjóðarinar, auðlindirnar sem framtíð okkar byggist á því það sé fótboltaliðið sem menn halda með, sem gerir það. Hvað er að slíku fólki? Er því sama um samfélagið?

Og mennirnir sem ættu að halda sig heima fyrir og halda kjafti vegna skammar, geta stormað óhikað nú í fjölmiðla án þess að fá óþægilegar spurningar, líkt og sölumaður IceSave sem mætir eins og fíkniefnasali í fjölmiðla og grenjar undan því að verið sé að bjarga fíklunum úr bráðri lífshættu vegna kattarskítsblandaða heróinsins sem hann seldi þeim. Ætti þetta fólk ekki að skammast sín, er illfyglum Bláu handarinnar svo gersamlega sneydd samviska og iðrun, að þeir telja sig hafa efni á þvi að rífa kjaft eftir það sem þeir gerðu okkur? Var siðblinda skömmtuð genetískt með aðstoð Kára í þennan kór, fyrir ríkisábyrgð á Decode?

Við bætist að gamla ömurlega pissuröflkeppnin um Jón Ásgeir vs. Davíð er að hefjast á ný, nú þegar landanum hefði átt að vera flestum ljóst að báðir aðilar eru í raun barátta eins Frankenstein-skrímslis frjálshyggjunnar sem var ekki nógu hlýðinn skapara sínum Dr. D.O. Frankenstein en sá hinn sami skapaði í veruleikafirru sinni, illvígan her stuttbuxnaskrímsla og sleppti þeim eftirlitslausum í frjálshyggjutilraunarstofu sinni til að sjá hversu fljót þau yrðu að rífa tilraunadýrin sem íslenskur almenningur kallast, á hol. Erfitt er að sjá hvor er verri því þeir eru báðir stikufríir hrunvaldar sem iðrast einskins og svífast einskins í sínum Freddy vs. Jason-slag, en við sem búum hér í þessu landi þurfum að þjást og blæða  fyrir afleiðingar gjörða beggja(og fleiri slíkra), jafnvel lengur en börn og barnabörn okkar lifa.

davi_sopi_gunnar_fbl_081212_913482.jpg

Ég er svartsýnn já, ég er það því samfélagið og atburðir síðustu vikna og mánuða er ekki að gefa manni von um að nokkuð breytist hér frekar en áður. Fátt eitt gefur manni von hér á haustmánuðum og óútprentuð skýrsla frá rannsóknanefnd sem maður hefur vissar efasemdir um vegna orðsins "Alþingis" sem hengt er við nafngift hennar, mun ekki varla breyta neinu. Hví segi ég það? Því viðbrögð stjórnmálastéttarinnar eru mjög fyrirsjáanleg og keimlík viðbrögðum yfirstéttar hrunvalda. Enginn verður dreginn til ábyrgðar úr stjórnsýslu, engir þingmenn eða ráðherrar þurfa að gangast undir landsdóm, enginn þarf að sæta ákærum fyrir landráð eða aðra þá glæpi/vísvítandi gáleysi sem þeir frömdu, samtryggingin er nefnilega ofar réttlætinu og ofar þjóðinni enda gætu upplýsingar um sérstaka fyrirgreiðslu stjórnmálastéttarinnar í Landsbankanum annars farið á stjá. Þó má reikna með að fundinn verði millistjórnandi eða skúringakerling út í horni til að kenna um hrunið. Enda er alltaf slíkum peðum er vel hægt að fórna í þeirri von um að skríllinn friðist svo auðmennirnir og stjórnmálaflokkarnir fái að halda áfram með sitt klíkræði sem aðalgrunnstoð samfélagsins um ókomna tíð.

Hvar er réttlætið í þessu? Hvar er vonin? Hvar er varðstaðan um að hið Fjórða Ríki Frjálshyggjunnar fái ekki að halda áfram ótrautt eins og ekkert hafi gerst? Hvar er hið Nýja Ísland sem okkur var lofað? Hvar er nýr samfélagssáttmáli og stjórnlagaþingið sem talað var um en hefur dottið út af borðinu að því virðist, kæft með kodda þingsins í von um að enginn muni eftir því í haust?

Því er ekki nema von að maður velti fyrir sér hvort baráttan fyrir Nýju Íslandi sé ekki andvana fædd, sérstaklega þar sem sumir baráttumannanna hafa fallið fyrir fagurgala hins Gamla Íslands og látið lýðskrum Keisarans og náhirðar hans afvegaleiða sig í baráttunni og barið á potta í takt við spunaskrum InDefence fyrir hrunflokkana tvo. Sum börn búsáhaldabyltingarinnar gleymdu meira að segja hugsjónunum, átu byltinguna og lögðust í hjaðningavíg sín á milli, stuttbuxnastormsveitum og Svarthöfðum stjórnmála og fjölmiðla, til mikillar skemmtunar og ánægju.

Maður veltir því einnig fyrir sér hvort þetta sé ekki töpuð orrusta(jafnvel stríðið allt) líkt og í fimmta kafla Stjörnustríðs: Keisaraveldið snýr aftur, og hvort það sé ekki best fyrir sem flesta að yfirgefa þá ísplánetu sem hér mun fyrirfinnast í  óbyggilegu samfélagi óréttlætis, spillingar og lénsskipulags náhirðarinnar, í þeirri von um að betri framtíð finnist í fjarlægari löndum, þar sem réttlæti er ekki eitthvað orð án merkingar, von er eitthvað sem þess er virði að lifa fyrir og samfélagssáttmáli er ekki eitthvað sem skeint er sér með á klósetti Gamla Íslands sem staðsett er í Valhöll.

En hver veit, kannski er svartsýnin of mikil hjá mér og ég er að líta á þetta vitlaust í myndlíkingu minni. Kannski á ég að vera bjartsýnn og líta á þetta sem erfiða baráttu hóps bandamanna við að halda víginu í miðri Ardennusókn örvæntingarfullra herja Fjórða Ríkis Frjálshyggjunnar, í þeirri von um að halda út þar til skriðdrekar hins Nýja Íslands undir forystu réttlætisgyðjunnar, komi þjóðinni til bjargar í þessari lokasókn náhirðarinnar gegn bjartari framtíð hennar.

Maður spyr sig.


Og hinn nýi ritstjóri er...

Eins og sjötíu prósent þjóðarinnar, þá hrökk ég í kút yfir þessum fréttum að hrunvaldurinn sjálfur, myrkrahöfðinginn af Svörtuloftum og Smjörklípuhöfðinginn, ætti að verða gerður að ritstjóra Morgunblaðsins og trúði því varla. Samt tók hjarta mitt kipp af ótta og hræðslu, hendur mínar gripu upp krossa, stjaka, hvítlauk, vígt vatn, langspil og annað sem beitt er gegn slíkum illum vættum og uppvakningum  sem læðast um í myrkrinu og nærast á sálum vorum.

Svo fór ég að hugsa aðeins málið og komst að annarri niðurstöðu. Ég fékk skyndilega þær grunsemdir að þetta sé enn einn spuninn því maður þyrfti annað hvort vera búinn að missa vitið, vera gersamlega blindur í viðskiptum eða svo skítsama um Morgunblaðið tl að ráða uppvakninginn skaðlega til starfa, nokkuð sem flestir geta séð og vottað um að séu slæm viðskipti fyrir fjölmiðil sem þarf að halda trúverðugleika, lesendum og áskrifendum á tímum kreppu og varla eru allir Sjálfstæðismenn svo hrifnir af Davíð að þeir tækju þeirri fyrirskipun frá flokksforystunni að gerast áskrifendur.

Nei, það er verið að búa til spennu, það er verið að undirbúa landann, koma af kaffistofu umræðu næstu daga, fá fólk til að nötra af hræðslu og kveðja skyldmenni sín til öryggis því að þegar stóra stundin kemur, þá verður lostið svo mikið, ánægjan svo mikil og hamingjan yfir því að ráðinn skuli til starfa ritstjóri sem höfði ekki bara til þeirra fáu sem fletta Morgunblaðinu í dag í von um að sjá dautt fólk í minningargreinum, heldur manneskja sem er hæfari en Davíð og höfðar til þeirra sem grilla á kvöldin jafnt sem þeirra sem yngri og gáfaðri eru, poppar upp blaðið og gerir það vinsælt.

Og nýi ritstjórinn sem tilkynnt verður um á fimmtudaginn er í raun:

ELLÝ ÁRMANNS!

Hún mun allavega gera mun betri hluti með Moggann en Dabbi, það geta flestir samþykkt.


mbl.is Ekki búið að ráða nýjan ritstjóra
Tilkynna um óviðeigandi tengingu við frétt

Hugleiðingar um sýnileika stjórnmálamanna og leiðtoga

Eitt af því sem hefur verið að naga mig upp á síðkastið , er umræðan um að Jóhanna sé ekki sjáanleg og svo söngurinn um að það vanti leiðtoga til að stappa stálinu í fólk. Ég hef aðeins sveiflast til með þessum söng, svona allt þar til ég fór að hugsa betur um þetta hluti en þá hef ég verið færast hægt og rólega í burtu frá þessum hrópum og köllum sem skipta engu máli í raun.

Nú hafa allir svosem frekar misjafnar skoðanir á aðgerðum ríkistjórnar(ég sjálfur er mishrifinn) og orðum stjórnmálamanna í fótboltaliðum leikskólans við Austurvöll, en þegar maður byrjar að spyrja sjálfan sig ákveðinnar spurningar um þessa umræðu. Hversvegna? Hversvegna þarf Jóhanna að vera svona sýnileg að mati sumra?

Fyrir það fyrsta þá þegar ég fór að hugsa um það, þá skiptir það mig engu máli hvað Jóhanna hefur að segja til að stappa stálinu í fólk eða hvað þá aðrir leiðtogar í stjórnmálum eða stjórnmálamenn. í raun skiptir það ekki máli hvað  stjórnmálamenn segja eða hvort þeir séu sýnilegir, það sem skiptir máli fyrst og fremst er hvað þeir gera. Sýnilegustu stjórnmálamennirnir eru nefnilega ekki þeir bestu endilega eða þeir sem gaspra hvað mest, líkt og sjást á úldnum undanrennusöngvum Sigurðs Kára og stuttbuxnadrengjanna sem sóttist eftir athygli með allskonar bulli sem skilaði okkur þjóðarþroti og siðrofi samfélagssáttmálans. Það sama á við sápukúlurnar sem fjúka út úr munni félagsmálaráðherra þegar hann mætir á svæðið í spjallið enda hefur varla nokkur skiljanleg og heil brú fundist í hjali hans, aðeins loðnir frasar sem ekkert innihald hafa.

Þá held ég að ég vilji frekar dauðaþögn frá stjórnmálamönnum og sjáanleg verk birtast í framkvæmd, innantómt hjalið kallar frekar fram kjánahroll sem fyrirfinnst einnig í tilkynningaskyldu spunahóps Framsóknar í InDefence og væli sölumanna dauðans yfir fíknó....fyrirgefið, sölumanni IceSave í Sjálfstæðisflokknum, yfir því að aðrir séu að taka á skítnum eftir þá. Semsagt aðgerðir, ekki orð eru það sem skiptir mestu máli, reynslan af íslenskum stjórnmálamönnum hefur sannað það.

En þá fer maður einnig að spyrja sig, hverjir eru þetta sem tala svo, hverjir eru þetta sem gagnrýna Jóhönnu fyrir að vera ekki allstaðar eða heyrast á hverjum degi í. Svarið er frekar augljóst þegar litið er yfir sviðið, það eru klappstýrur hrunsins úr Valhöll að mestu, það eru þeir sem koma úr stjórnarandstöðu sem láta mest og það eru spunahöfundar andskotans sem hanna þetta. Einn stór spuni um eitthvað sem skiptir marga engu máli en er bara þetta venjulega: að reyna að koma höggi á andstæðinginn og grafa undan honum á einhvern hátt með því að spila á tilfinningar fólks.

En hversvegna er hamast svona á þessu? Þarna telja menn sig hafa fundið einhvern veikleika stjórna, eitthvað sem þeir telja að höfði til tilfinninga fólks, eitthvað sem er hægt að láta fólk trúa um að skipti í raun máli þegar það gerir ekki "jack'n'shit" fyrir okkar daglega líf og heilsu, hvort einhver manneskja mæti til að hugga okkur í sjónvarpi eða útvarpi. Ef það sé málið, þá þurfum við að leita okkur öll sálfræðihjálpar ef við séum svo illa stödd að þurfa stjórnmálamann til að þerra tárin á kinnum vorum eða jafnvel einfaldlega gefast upp og fara héðan.

En svo er að skoða það sem fylgir eftir í þessum spunasöng einnig, ekki bara gagnrýnin á sjáanleika heldur hvað fylgir eftir alltaf, þessi gullna setning:"við þurfum leiðtoga". Já, við þurfum leiðtoga, sérstaklega ef maður er hræddur hægri maður sem hleypur eins og hauslaus hæna í kringum grillið sem þú hefur staðið við síðustu árin, hugsunarlaust og ekki vitað hvernig þú eigir að tala og svara. Fjandinn hafi það, ég skil þá fullkomlega líka, sitjandi uppi með Bjarna Ben sem leiðtoga og myndi votta þeim mína dýpstu samúð ef þeir ættu ekki allt hið versta skilið fyrir hrunið sem þeir iðrunar- og samviskulaust telja að að þeir beri enga ábyrgð á, né telja að eigi að gera nokkuð í átt til siðbótar og heilbrigðs samfélags á ný.

Enda þegar þessar hræddu hænur eru keyrðar í gegnum CSI-maskínur sem greina hvað hænurnar í raun vilja, þá má sjá að þær vilja allar eitt: þær vilja Davíð(eða klóm hans frá Kára) á ný til valda því hann kenndi þeim að þær þurfa ekki að hugsa, þær þurfa ekki að skipta sér að neinu, þær þurfa aðeins að tilbiðja og verja Leiðtogann. Ég veit allavega ekki um aðra en þegar minnst er á Davíð og Leiðtoga í sömu setningunni, þá byrja ég yfirleitt að sjá rautt, brýt glerið utan af neyðar-trommusettinu mínu og er tilbúinn í slaginn við að berjast gegn þeim uppvakningi hrunsins á ný og hinum lifandi dauða stuttbuxnaher sem ráfar um göturnar í leit að manneskjum til að nærast á. Við þurfum nefnilega ekki eitthvað gamalt, geggjað hró á ný til valda, sérstaklega eftir að viðkomandi gerði Seðlabankann gjaldþrota og hefur gert þjóðinni mun meiri skaða en Móðuharðindin á efnahagslegum sterum enda er slíkur uppvakningur, eingöngu til þess fallinn að sundra þjóðinni enn meir.

En þurfum við einhvern leiðtoga og alla þá leiðtogadýrkun sem íslenskum stjórnmálum fylgir miðað við reynsluna? Nei, engan veginn ekki því slíkt hefur hindrað alla lýðræðislega þróun og verið lýti á allri umræðu þessa lands þar sem fólk fylkir sér líkt og rollur á beit utan um forystuhrútinn sem má gera hvað sem honum sýnist líkt og fyrrnefndur Davíð, í þágu klíkubræðra og spillingar valdsins. Lög má brjóta, beygja, siðrof er fínt ef það þjónar flokknum og Foringjanum en leiðtogadýrkunin þjónar aldrei hagsmunum almennings þegar á heildina er litið. Nei, við þurfum ekki svona leiðtoga, hinn eina leiðtoga sem ræður yfir landinu og allir bugta og beygja sér fyrir og þeir sem gera það ekki, eru kallaðir geðveikir, Baugspennar fullir af annarlegum hvötum, fullir af sjúklegri öfund eða hatri og eru fífl, fávitar og asnar fyrir að skilja ekki mikilfengleik Leiðtogans eina. 

Ef við þurfum leiðtoga, þá þurfum við ekki leiðtoga sem standa í pólitisku skítkasti eða lýðskrumi í von um völd flokksins eina(og klíkubræðra) framar hagsmunum þjóðar, við þurfum ekki leiðtoga sem sveiflast til með vindinum eftir skoðanakönnunum, við þurfum ekki leiðtoga sem er þjónn auðmanna og Viðskiptaráðs, við þurfum ekki leiðtoga sem gefur vinum sínum auðlindir og banka landsins, við þurfum ekki leiðtoga sem nærist á pólitískri spillingu og við þurfum alls ekki leiðtoga sem telur að valdið sé hans eins og hirðarinnar sem hann dýrka.

Nei,,þá þurfum við frekar marga leiðtoga en ekki einn, sem skilja orðið samvinnu, sem skilja það að leggja þurfi til hliðar stuttbuxnadeildir og spunameistara, sem skilja að froðublaður skipti minna máli en framkvæmdir, leiðtoga sem segja okkur umbúðarlaust hvernig hlutirnir eru í raun, leiðtoga sem þora að taka óvinsælar ákvarðanir á kostnað pólitískrar framtíðar sinnar, og marga samhenta leiðtoga sem myndu einbeita sér að því að vinna að því koma landinu á það stig að hér verði til heilbrigt samfélag sem rísi upp úr gerspilltri ösku Fjórða Ríkis Frjálshyggjunnar, samfélag sem maður getur verið stoltur af því að hafa upplifað að sjá verða til.

En eitt veit ég þó fyrir sjálfan mig, eftir þessa stuttu naflaskoðun um leiðtoga og slíkt, að ég þarf ekki að fá einhvern leiðtoga til að stappa í mig stálið, ég þarf ekki að hlusta á froðu spunameistara um að allt reddist ef leiðtoginn eini ráði, ég þarf ekki að sjá smettið á stjórnmálamönum til að líða betur því ég veit hvað það er sem fengi mig til þess að rísa upp úr þessari ösku, fengi stálinu stappað í mig, fengi mig til þess að fá von á ný að spillingin verði sigruð og framtíð verði sjáanleg, og það er eitt orð sem kristallar það.

 

 

RÉTTLÆTI!

 

 


Afsökunarbeiðni til þjóðarinnar

 Mín kæra þjóð(fyrir utan útrásarvíkinga, bankamenn, Sjálfstæðismenn og önnur samviskulaus fól sem leitt hafa okkur í glötun),

 ég er búinn að horfa lengi í gaupnir mínar, hljóður og fullur af iðrun. Í dag langar mig til að biðjast vægðar af ykkur og bera fram afsökunarbeiðni í þeirri von um að þið getið einhvern tímann fyrirgefið mér þær syndir sem ég játa hér.

Til nánari útskýringar og formála fyrir þá sem vilja vita hversvegna ég leita mér fyrirgefningar svo sál mín geti hvílst, þá tók ég þátt í stofnun, störfum, kosningabaráttu og skrifum fyrir Borgarahreyfinguna í þeirri trú að það fólk sem færi inn á þing, væri heilt og heiðarlegt fólk sem væri hafið yfir það að festast í persónulegum erjum, engum til góðs. Því miður brást mér bogalistin þá og líkt og ég sagði frá áður, fóru leikar þannig að ég yfirgaf hreyfinguna eftir hið fræga Alzheimer-bréf. Þó ég hafi gengið á brott fullur vonbrigða yfir því hvernig leikar höfðu þróast, þá vonaði ég svo innilega að fólk gæti náð sáttum, að fólk gæti náð að horfa frá persónulegum deilum og horfa í átt til heildarinnar því manni þótti þetta sárt, sérstaklega með tilliti til margs hins góða fólks sem innan hreyfingarinnar starfaði, að horfa upp á það sem fór fram.

Reyndin var önnur, þetta var falsvon, von sem var fyrirfram dauð þó ég neitaði að horfast í augun við það sem var að: þinghópurinn var ónýtur að atgervi þegar kom að samvinnu, sáttfýsi, auðmýkt, virðingu við aðra og heilindum í samskiptum við annað fólk, nokkuð sem ég komst að í einkasamtölum við þá sem ég treysti en gátu ei meir þegar að þinghópnum, duttlungum og einræðis-æsingi þeirra kom.

Enda fór sem fór, í stað þess að nota það tækifæri sem landsfundur Borgarahreyfingar var, til að ná sáttum, sáðu þau meiri sundrungu með hrokafullri hundsun lýðræðis og hafa gert það að verkum að breytingarafl það sem lagt var af stað í upphafi, er stórskaðað, rúið trausti líkt og þingflokksformaðurinn, orðið að athlægi og mælist nú rétt svo í upphafsfylgi. Ég vill samt taka það fram að margt af því fólki sem valdist til stjórnar nú og áður, það fólk sem eltir þingmennina eða heldur ótrautt áfram er margt hvert gott fólk sem hefur hjartað á réttum stað, og ég innilega vona að það fólk geti náð að rífa Borgarahreyfinguna upp úr öskunni(og hinir einstaklingarnir sem heilir voru en fylgdu þrenningunni, snúi aftur...án þrenningar að sjálfsögðu).

 Ég játa að í dag er ég fíflið, bjáninn sem féll fyrir fagurgala, kjáninn sem féll fyrir látbragði gæðaleikara sem gaspra um hugsjónir og lýðræði af falskri innlifun, án þess að hafa nokkurn skilning á þessum orðum eða öðrum slíkum.

Ég játa að hafa haft von í mér um að þetta fólk hefði í sér þann félagsþroska sem til þyrfti í samstarfi með öðrum, gæti séð að sér og reynt að ná sáttum.

Ég játa að í dag er ég heimski maðurinn sem lagði á plóginn með trú fávitans um að hægt væri að breyta einhverju í stjórnmálalífi landsins en hef líklegast átt þátt í að stórskaða von um að ný framboð geti sprottið upp og breytt hinu pólitíska landslagi til frambúðar.

Kæru Íslendingar og aðrir íbúar þessa sokkna skers(-fyrrgreindir að sjálfsögðu), ég vill biðjast afsökunar á eftirfarandi hlutum:

  • Ég biðst afsökunar á því að hafa lagt vinnu, orku og hjarta í það að koma þessum einstaklingum á þing sem líta á alla sem eru á annarri skoðun sem fífl, fávita og aumingja.
  • Ég biðst afsökunar á því að hafa komið fólki til valda sem skortir alla þá auðmýkt, gagnkvæmu virðingu, heilindi og siðferði til að koma á hugarfarsbreytingum.
  • Ég biðst afsökunar á því að hafa komið til valda, fólki sem talar um lýðræði en getur ekki sætt sig við niðurstöður þess, líkt og sást á landsfundi Borgarahreyfingarinnar, hvað þá skilið að lýðræði byggist m.a. á því að stundum tapar maður í kosningum.
  • Ég biðst afsökunar á því að hafa komið einstaklingum inn á þing, sem umbreyttust í það sem barist var gegn á mettíma, hvort sem það var vegna blekkinga eða ógeðisdrykk brugguðum á þingi úr svita Davíðs Oddsonar, táfýlu Finns Ingólfssonar og krókódílatárum Árna Johnsen.
  • Ég biðst afsökunar á því að hafa trúað því um tíma að þessir einstaklingar myndu geta brotið odd af oflæti sínu og reynt að tala sig niður á sameiginlega niðurstöðu þó hún væri ekki hin fullkomna lausn.
  • Ég biðst afsökunar á því að hafa brugðist því fólki sem reyndi hvað það gat til að lægja öldur innan hreyfingarinnar, öllu því fólki sem reyndi að starfa í þágu hreyfingarinnar en uppskar fyrirlitlegt yfirlæti þingmanna og þá sem börðust við þennan þríhöfða þurs í þeirri von um að hægt væri að ná sameiginlegri sátt, með því að yfirgefa það á ögurstundu í stað þess að leggja mitt á vogarskálarnar.
  • Ég biðst innilega og af öllu mínu hjarta, alla þá afsökunar sem kusu þessa einstaklinga inn á þing á grundvelli orða og skrifa minna, og trúðu því sama og ég: að þau færu þangað inn af heilindum en ekki persónulegum metnaði.
  • Einnig vil ég að lokum nota tækifærið til að biðjast afsökunar á öðru illvirki sem ég framdi og skaðaði íslensku þjóðina til frambúðar: ég vill biðjast afsökunar á því að hafa kosið Sjálfstæðisflokkinn með Davíð Oddson efstan á lista og átt minn þátt í að halda honum við völd. Sál mín mun brenna í víti fyrir það um alla ókomna tíð ásamt Ice-Slave skuldum sem brennimerktar eru svo í hold mitt:" Með ást frá FL-okknum."

Ég vona því að hinir ágætu landar mínar og þjóð mín góð, geti fyrirgefið mér heimsku mína, fyrirgefið mér syndir fávitans sem trúir að það sé til gott fólk sem vill vel, fyrirgefið mér heimskupör og illvirki þau sem þetta brölt mitt hefur skilað, að í stað þess að hafa komið þjóðinni á þing, þá á ég þátt í að koma sjálfhverfum, hrokafullum ÉG-um á þing, sér einum til dýrðar og öðrum til kjánahrolls.

Ég lýt nú höfði  mínu í auðmýkt og bíð eftir dómi ykkar(og sögunnar) með von um fyrirgefningu synda vorra,

Agnar Kr. Þorsteinsson

P.S. Það skal tekið fram að útrásarvíkingar, bankamenn, Sjálfstæðismenn og önnur fól sem hafa sundrað samfélagi voru og sökkt skerinu, þurfa ekki að sættast við mig eða fyrirgefa. Þeir teljast ekki til þjóðarinnar né annarra mennskra samfélaga eftir hermdarverkin sem þeir frömdu og iðrast ei nú né nokkurn tímann um ókomna tíð, enda væri það „óábyrg meðferð á samvisku".


mbl.is Hreyfingin verður til
Tilkynna um óviðeigandi tengingu við frétt

Magma-leiksýning fáránleikans í Hringleikahúsi REI-hópsins

Í dag ákvað ég að skjótast fyrr úr vinnuni til að ná leiksýningu sem sett var á svið af REI-leikhópnum fræga í Hringleikahúsinu við Tjörnina. Kallaðist sýningin Magma mín-auðlindargjafarblús í D-moll og í henni átti að koma fram aragrúi af þekktum stjörnum á borð við útrásarvíkinga, S-hóp, heimspeking frjálshyggjunnar dr. Hannes og aðra frægar stjörnur sem kætt landann af svo miklum fögnuði að efnahagskerfið hrundi. Söguþráðurinn gekk út á súrrealíska sirkussýningu þar sem hópur strengjabrúða frjálshyggjunnar með 30 silfurpeninga í stað sálar, áttu að koma auðlindakjötbita í kjaft hrægamma og hýena sem ráfuðu um í skugganum og kipptu í strengjabrúður sínar. Til mótvægis voru þarna til staðar hinir sjö samuraiar sem áttu að segja NEI!NEI!NEI! í hálfvonlausri fyrirfram ákveðinni baráttu.

Ég reyndar var aðeins seinn fyrir þannig að ég kom inn í mitt upphafsatriðið þar sem fýlulegur gargari blés út úr sér froðukenndum sápukúlufrösum frjálshyggjunnar og  hver léleg lygin fauk á fætur annari. Áhorfendum var lítið skemmti yfir þessu atriði, einkum vegna ósannfærandi ofleiks og innihaldsleysis prímadonnu verksins, og létu því í ljós megna óánægju sína sem prímadonnan fúla átti skilið og henni til mikils pirrings, enda hélt hún að viðbrögðin yrðu mun betri við þessu verki sem hafði í fyrri uppfærslu heitið REI-kurrinn mikli eða hvernig við dvergarnir sex ætluðum að stinga oddvita okkur í bakið en fengum rýtingasett sjálf í bakið.

Eftir smá rokkaðan söng frá hópi samurai-anna sjö sem vakti bærilega hrifningu áhorfenda sem þótti ýmislegt í textanum eins og talað úr hjarta sínu, þá átti að koma fram aðalatriði sýningarinnar eða S-hópurinn með Finn Ingólfs nokkurn í fararbroddi. Spennan var því einstaklega rafmögnuð orðin þegar salurinn var myrkvaður og tjöldin dregin frá við söngpúlt andskotans undir tilkynningarsöng forsetabrúðarinnar:"Og héééér er FINNUR!"

En nei, ekki stóð Finnur þarna með strengjasveit sinni S-hópurinn, heldur var þar eingöngu ódýr eftirlíking sem söng söngva Finns líkt og léleg útgáfa af Geir Ólafs að taka Frank Sinatra á hátíðarstundum. Út úr honum dundi falskur Einkavinavæðingarsöngur Finns en flestir ættu að kannast við viðlagið:

"Ekki benda á mig, sagði Framsóknarmaðurinn.

Þetta kvöld var ég að ræna almannasjóði,

spurðu þá sem ekki voru hér,

ég ábyrgist að smjörklípan lendir þar."

Við þessa svik og pretti brugðust áhorfendur mjög reiðir við enda vörusvik í besta falli og landráð í versta dúr. Hrópuðu þeir ótt og títt:"Hvar er Finnur? Finnum Finn!" og skimuðu um allt en sáu hann ei leynast í skugganum glottandi yfir þessum hrekk sínum. Loks varð einum áhorfenda nóg boðið yfir þeim ögurlegheitum sem í þessum einstaklega falska söng fólst og kastaði hann því krónu á sviðið til að reyna að kaupa þögn í blæðandi eyru áhorfenda. Ekki gekk það né þagnaði þessi forsöngvari fjandans þrátt fyrir örvæntingarfyllri og hærri boð þeirra sem í stúku sáttu og hrökkluðust einstaka jafnvel í burtu, hálfgrátandi og miður sín upp á slysavarðastofu til að láta gera að eyrnaskaðanum.

Þegar eftirherman illræmda lét loks sviðið eftir, þá reyndu hinir sjö samuraiar að koma fram mótbárum og hafa áhrif á heila og heyrnarlausar strengjabrúður sem sumar hverjar voru sendar upp til að fara með „Ekki benda á mig, allir aðrir bera ábyrgð"-sönginn sem kunnur er frá þessum brúðukór og þykir einstaklega heimskulegur og illa saminn. Gerði það áhorfendur enn reiðari og sárari yfir þeim drottinsvikum sem þessi leikhópur framkvæmdi gegn þeim og öðrum þeim sem þurfa að greiða fyrir uppsetningu í allt að 130 ár(með sérstökum 9,3 milljarða aðgöngumiða fyrir leikhúseigendur).

Var því orðið frekar reitt, pirrað og sárt andrúmsloft þegar prímadonna steig digurbarkalega á ný upp á sviðið í lokasöng sem leiddi til endi þessa mikla harmleiks í söngleikjaformi.  Einstaka áhorfenda sem ekki vissi betur, dreymdi í smástund að út um gribbulegan munn kæmi jákvæður söngur sem gæfi von um farsælan endi. Sú von hvar um leið og prímadonnan glotti illkvittnislega að áhorfendum og hóf upp sinn frægasta og leiðinlegasta söng sem reglulega er sunginn af laglausum stuttbuxnadrengjum í ránsferðum:"Bendum bara á Samfó, það eru okkar einu rök."

Galaði hún og gargaði af svo mikilli innlifun hrokans og ákefð að hægðir sínar missti hún í brækur og til hliðar gekk hún með saurslóðina á eftir sér, fullviss um ofurframmistöðu sem nísti sálir áhorfenda inn að beini. Svo reyndist ekki fara enda voru áhorfendur einfaldlega í losti yfir frammistöðunni og hinni ógeðfelldu,s viksömu sýningu sem í hroða sínum slæi út stanslausa sýningu á Anti-Christ Lars Von Triers, með áhorfandann læstan til 65-130 ára í A clockwork orange-hjálminum fræga.

Lokasenan rann upp þar sem hinir sjö örvæntingafullu samurai-ar hrópuðu Nei-nei-nei! Á meðan strengjabrúðurnar kölluðu Já-Já-Já þegar kippt var í spotta af brúðumeisturum úr Magma, Capacent Glacier, Valhallar-kórnum og strengjasveit S-hópsins. Áhorfendur voru þá búnir að fá nóg, hrópuðu réttilega að strengjabrúðurnar væru að svíkja þá sem borguðu fyrir „show"-ið og voru búnir að fá nóg þegar kippt var fast í Gísla, brúðuna glaðlyndu sem hafði verið límdur fastur við Fésbókar-uppfærslur.

Þessi hræðilega sirkussýning andskotans endaði svo með því að prímadonnan stóð upp og byrjaði að benda til áhorfenda í valkvæðni með sömu einbeittu kuldalegheitum og þeir böðlar sem velja hvort menn lifi eða deyi í vinnubúðum einræðisríkja. Féllu fingur hennar á drengi nokkrum sem hafði séð aumur á henni og fært henni salernisrúllu til skeiningar. Skipti þá engum togum að þrír einkennisklæddir útkastarar og dyraverðir valdsins gripu drengstaulann og kunningja hans tvo sem ekki voru sáttir við að þurfa að borga gjaldið mikla fyrir svona lélega sýningu. Voru þeir keyrðir niður og reykspóluðu svo inn hluti af sérpantaðri stormsveit sem beðið hafði verið um sem gestaleikarar, í óaðfinnanlegum gæsagangstakti til aðstoðar dyravörðum valdsins.

Leikararnir flestir kvöddu þá sviðið, sumir glottandi og glaðir yfir því að hafa blekkt áhorfendur svo vel á meðan einstaka stóð eftir til að fylgjast með viðbrögðum áhorfenda sem létu í sér heyra reiðina sem best var lýst í orðum gamals öryrkja sem stóð þar hokinn með hækju sína og hrópaði sannleikann sára til lélegra strengjabrúðna sem eftir stóðu:" Þið ættuð að skammast ykkar!"

Því hélt maður út frekar dapur, reiður og sár eftir þessa hörmungasýningu sem kostað hefur alla þá sem á horfðu, alla þá sem leikendum greiddu og alla þá sem í uppsetningu áttu: yfirráð auðlinda til 65-130 ára að viðbættu 9,3 milljarða króna tapi leikhópsins á uppsetningunni. Þó var reynt að draga úr tapinu með því að segja að í staðinn fengjust 30 milljónir á ári í svokallað auðlindagjald þó við mættum ekki nota sjálf auðlindirnar í jafnlangan tíma og hefur liðið frá stofnun lýðveldisins.

Lokadómur er því á þessu verki að sjaldan hafa slíkar hörmungar sést hvort sem það var handrit eða leikstjórn. Leikhópurinn óheyrilega falskur og augljóslega fjarstýrt meirihlutameginn. Minnihluti leikhópsins átti þó góða spretti og virkaði á köflum að hann væri einlægur en náði þó ekki tilætluðum árangri. Uppsetning, leiktjöld og sviðsetning augljós og illa gerð með geigvænlegu tapi sem gæti kostað framleiðendur og áhorfendur alla framtíð og von í auðlindalausu landi fyrirtækjaræðis.

Vonandi verður þessi leikhópur  frjálshyggjunnar og leiksýning spillingar lögð niður um alla tíð, öðrum sem sársaukafullt víti til varnaðar.


mbl.is Sala í HS Orku samþykkt
Tilkynna um óviðeigandi tengingu við frétt

Svar borgarfulltrúa vegna Magma-bréfs og andsvar

Ég sendi opið bréf á borgarfulltrúa alla í gær vegna Magma-samningsins þar sem ég hvæsti aðeins á borgarfulltrúa um að þeir ynnu vinnuna sína, tækju niður flokksgleraugun og hugsuðu um hag almennings alls í þessu máli. Tveir borgarfulltrúar virtu mig viðlits og sendu mér(og virði það alveg við þær báðar): Sóley Tómadóttir sem sagðist ætla að segja nei við samningnum og svo Þorbjörg Helga eða Tobba, sem fékk mig til að hvæsa harkalegra til baka enda er þetta mál mun stærra að mínu mati heldur en einhver flokkapólitík og að hægt sé að skjóta sér undan ábyrgð í þessu máli..

Eins og ég tók fram í lok bréfsins, þá myndi ég birta svör borgarfultrúa og andsvar mitt fylgir með ef einhver vildi vilja skamma mig fyrir urrið í mér. Læt það ykkur eftir að dæma hvort ég var of hvass í mínum heita hamsi og nenni varla Mikka Mús-leik í þessu máli, en hvet þó alla sem ekki er sama að halda áfram að senda bréf og mæta kl. 14 á pallana.

Svar Þorbjargar:

"Sæll Agnar,

 Ég hafna algjörlega dylgjum þínum um að við séum undir þrýstingi einhverra fjármálamanna. Þú gefur ýmislegt í skyn sem hefur verið leiðrétt í fjölmiðlum og vitnar í ónafngreinda óháða (!) aðila sem reikna út mat sitt á samningnum. Að lokum er út í hött að líkja þessu máli við REI málið nema að því leyti að nú er verið að gera sambærilegan hlut og þar var gert, að beina rekstri OR að grunnþörfum eigenda, sölu rafmagns og vatns til íbúa.

 Auðlindirnar eru áfram í eigu sveitarfélagana á Suðurnesjum og hafa aldrei verið í eigu HS orku.  Ég vinn fyrir Reykvíkinga og tel þetta vera gott skref og nauðsynlegt vegna úrskurðar Samkeppniseftirlitsins um eignarhlut OR í HS orku.   Mín skylda er að kynna mér málið og taka ákvarðanir út frá eigin sannfæringu.

 Máilið er vissulega flókið en 30% eignarhlutur OR getur ekki haft nein áhrif á það sem þú telur upp að sé nauðsynlegt. Ég skora á þig að senda þetta skeyti á þá ráðamenn sem eitthvað hafa um þetta að segja, þ.e alþingismenn og skilanefndir bankanna sem nú eru að afhenda hlut Geysis Green Energy til erlendra kröfuhafa í gegnum Íslandsbanka.

 Þegar þú talar um að auðindir séu að fara á aðrar hendur þá ertu væntanlega að tala um lög um leigu á auðlindum og svokallað auðlindagjald sem sveitarfélög af Suðurnesjum fá sem rentur. Þetta er sett í lög sem samþykkt voru í fyrra og Reykjanesbær fylgir og voru sett af þáverandi iðnaðarráðherra Össuri Skarphéðinssyni.  Það ættu að vera hæg heimatökin hjá ríkisstjórn Íslands að breyta þessu nù.   Þessi lög standa enn, óháð því hvort Íslendingur með annarleg markmið um nýtingu auðlinda leigir auðlindirnar eða útlendingur.

 Bestu þakkir fyrir bréfið,

Þorbjörg Helga borgarfulltrúi."

Urrið illilega til baka:

" Sæl,

 Ég get ekki annað en svarað þessu bréfi og fyrir það fyrsta hvað þú kallar dylgjur, er nokkuð sem er og hefur verið hin almenna leikregla í þessu gerspillta samfélagi sem skapað hefur verið hér, að viðskiptamenn þrýsti á kjörna fulltrúum og láti þá dansa eftir sínu höfði, hér í Nígeríu norðursins og því getur maður ekki annað en búist við öðru þegar kemur að hagsmunamálum þar sem greinilega er verið að fórna hagsmunum almennings í kjaft kanadískra skúffuribbalda sem virðast fyrst og fremst vera leppur útrásarvíkinga í augum margra

 Svo það að ég eigi að senda frekar bréf á skilanefndir og þingmenn því þetta sé svo ómerkilegt og hafi engine áhrif, þá er það algjörlega rangt. Þetta hefur áhrif, þetta tryggir Magma 43% hlut og mikil áhrif auk þess sem Reykvíkingar glata sínum hluta fyrir gjafverð. Þetta er eingöngu einn hluti af því að gefa þetta fyrirtæki og yfirráðin yfir auðlindinni til þessara aðila, og boltinn er hjá ykkur sem stendur að leggja hönd á plóginn við að stöðva þetta ef þið hafið manndóm til. Annars staðar í heiminum reyna fulltrúar almennings að stöðva svona hroða og hörmungar sem gætu hlotist af þessu brölti, en hér er farið bara í "ekki benda á mig, ég ber enga ábyrgð"-leikinn.

 Og já, það verður einnig dúndrað á skilanefnd, þingmenn og ráðherra til að stöðva þetta, þetta er ekki spurning um flokkapólitík, þetta er spurningin um hvort hægt verði að búa hér áfram, hvort það verði hægt að lifa í réttlátu og skynsömu samfélagi með auðlindirnar og nýtingu þeirra í almannaeigu, ekki hýena hlutabréfamarkaðarins sem ásælast þetta nú.

 Svo sendi ég þér útreikningana með svo þú getir lesið og tek það fram að ég kalla aðilann óháðan vegna þess að hann er fyrir utan þennan. Ég hef ekkert séð þetta hrakið tölfræðilega né á annan slíkan hátt enda reiknað út frá framkomnum forsendum. Aðeins er beitt "rökum" á borð við þennan fáránlega upphrópanaleik um að það eigi ekki að taka mark á einhverjum vegna þess að hann/hún tilheyri einhverjum öðrum flokki sem er móðgun við skynsemi hvers meðalgreinds borgara.

Og sem lokaorð af minni hálfu. Þar sem er REI-kur þar er eldur og ef það lyktar illa, þá er það eitthvað rotið og ekki bara óhreinu nærföt útrásarinnar. Sagan og reynslan af því hvernig hlutirnir eru framkvæmdir hér, hefur kennt flestum það.

 Kveðja,

 Agnar

 

 

 

 


Opið bréf til borgarfulltrúa vegna Magma-samnings

Eftirfarandi bréf var sent á alla borgarfulltrúa:

"Til borgarfulltrúa allra þó þessu sé sérstaklega beint til borgarfulltrúa meirihlutans,

Nú verður tekið fyrir á borgarstjórnarfundi mál sem er eitt hið mikilvægasta sem sést hefur í hugum margra. Á þessum fundi eruð þið nefnilega að taka þá ákvörðun um hvort þið ætlið að afhenda eigur almennings í hendur erlends skuggafyrirtækis sem enginn veit raunverulega hver á og rekið er af mönnum sem virðast eiga margt sameiginlegt með Gordon Gekko, þegar ráðgast er við herra Google.

Ég ætla því að reyna að höfða til skynsemi ykkar allra í þeirri von að flokksgleraugu verði lögð til hliðar og hugsað verði umi, ekki bara hagsmuni Reykvíkingana  sem greiða ykkur launin heldur þjóðarinnar allrar . Ég ætla því að benda ykkur á nokkur atriði samningsins til umhugsunar:

  • Magma notar eignalaust skúffufyrirtæki fyrir viðskiptin. Það er ákveðin vísbending um 2007 hugsunarhátt ósvífinna og samviskulausra þrjóta viðskiptalífsins og við hverju má búast.
  • Engar raunverulegar eignir eru fyrir þessum viðskiptum, aðeins veð í hlutabréfum og hrunið hefur kennt flestum Íslendingum að slíkt er jafn nothæft og að nota sandpappír í stað skeinispappírs. 
  • Samningurinn inniheldur í sér vexti upp á 1,5% af kúluláni til 7 ára. Bandaríkin sem fá hæstu lánshæfiseinkunn fá samkvæmt Bloomberg, best 3% lán. Þetta bendir augljóslega til að þetta sé brunaútsala og verið sé að afhenda þetta fyrirtæki sem ekkert er vitað um, gerir þetta enn vafasamra.
  • Á sama tíma er verið að greiða 4,5% vexti af láni vegna kaupa á sömu hlutabréfum og það verðtryggt.
  • Ákveðinn blekkingarleikur er settur fram með verðið þar sem lánið er í dollurum en er reiknað yfir í krónur. Miðað við það sem komið hefur fram þá má reikna með að ef og í raun þegar krónan hækkar, þá muni enn minna koma til almennings en reynt er að halda fram. Gengisáhættan og óljóst hjal um álverðstengingu að hluta gefur enga skýra mynd, heldur vekur upp einstakan vafa um ábata.
  • Samkvæmt útreikningum sem ég hef undir höndum og fleiri hafa séð frá hlutlausum aðila, þá er tap OR af þessum samning 9,4 milljarðar sem er ívið hærri tölur en kom fram hjá Samfylkingunni. Það fellur allt á almenning í raun því OR þarf að hækka verð til að ná því tapi inn og nóg skuldar OR fyrir þó þetta fé bætist ekki við. Hverjir borga svo það tap? Ekki þið sem á okkur nærist, aðeins við sem tilheyrum þeim undirmálslýð sem þið teljið eingöngu mjólkurkýr og kallast almenningur.
  • Með því að samþykkja þennan samning eruð þið meðsek í því að afhenda auðlindirnar í hendur einkaaðila í 65-130 ár, nokkuð sem þið hafið ekki siðferðislegan rétt að gera.

Nú veit ég ekki hvort verið sé að þrýsta á ykkur af áhrifamönnum úr viðskiptalífinu, hvort liðkað hafi verið með kaupunum með greiðslum undir borðum í reykfylltum bakherbergjum flokksklíkna eða hvort aðilar tengdir ykkur séuð að græða á þessu persónulega en eitt veit ég þó, að samningurinn er hroðalegur miðað við allt sem fram er komið. Þegar miðað er svo við atganginn og laumuspilið með kaup Magma frá upphafi, þá virðist þarna vera á ferð nýtt REI-mál miðað við að þarna sjást flestir af sömu leikendum eða verra. Sá orðrómur gengur nefnilega um að þið séuð í raun að fara að hleypa S-hóp, Bjarna Ármanns eða öðrum slíkum vörgum sem í raun standa á bak við Magma, til að rífa enn meiri sár á sálu þjóðarinnar og stefna framtíð hennar enn meir í átt til myrkurs vonleysis og kannski reglulegs rafmagnsleysis.

Slíkar gjörðir hafið þið ekkert vald til, það vald ber ykkur ekki því að auðlindir þjóðarinnar og nýtingarréttur er landsmanna allra að ákveða um. Það vald er ekki á færi smákónga sem hafa sett heilt sveitarfélag á hausinn eða stjórnmálaafla sem virðast ekkert hafa lært af REI-málum, hruninu og öðrum djöfulskap þeirra sem hafa aðeins aur í hjarta og blindaða af glýju gullgrafarans sem einskis svífst. Það er ekki heldur í valdi borgar-, bæjar- og sveitastjórna að taka svona afdrífaríkar ákvarðanir sem varða hagsmuni og lífsgæði komandi kynslóða í landinu án þess að um það ríki í samfélaginu þverpólitísk sátt og almennur vilji til þess. Ekki hefur ykkur verið veitt neitt slíkt umboð til þess af hálfu þjóðarinnar fyrir hrun og hvað þá eftir, ekki hefur ykkur verið veitt slíkt umboð til þess að vera með bruna-útsölur kortér í kosningar, ekkert umboð hafið þið til að taka svona ákvörðun án almennrar umræðu í samfélaginu.

Ég æski þess því að þið horfið ekki lengur á hlutina með flokksgleraugum lituðum hagsmunum klíkubræðra, heldur horfið og hugsið út frá því sem þið voruð ráðin til og hafnið þessum samning. Ef þetta sé svona glæstur samningur þá skuluð þið bjóða ríkinu að kaupa þetta á sömu kjörum eða það sem best væri að einfaldlega gefa Reykvíkingum eða landsmönnum öllum hlut í HS Orku svo það haldist í almannaeign. Fyrir slíkt geta margir þolað smá hækkun á rafmagnsverði, vitandi það að það fé fer til samfélagsins en ekki misjafnra manna af því tagi sem sett hafa þjóðina á hausinn.

 Ef skynsemin til að segja nei við þessum samning, er ekki á færi ykkar þá skuluð þið líta á þetta sem uppsagnarbréf um leið því ekki vill ég hafa slíka starfsmenn á launum, starfsmenn sem hugsa ekki um hag minn heldur gefa eigur minna og annarra með stórfelldum skaða fyrir alla eigendur. Ég vænti þess svo að þið látið ykkur þá hverfa í gleymsku sögunnar ásamt þeim viðeigandi minnisvarða sem ritaður verður í þessum dúr:"Engin verk gjörðu þau af viti heldur létu af hendi í misyndismanna veski, það eina sem þau ekki máttu: framtíðina og vonina sem í auðlindunum fólst."

Kveðja,

Agnar Kr. Þorsteinsson

P.S. Það skal tekið fram að ef svör berast þá verða þau birt opinberlega en eina gilda svarið í raun, er NEI við Magma-samning þriðjudaginn 15. september."

 Smá beiðni til allra sem vettlingi geta valdið. Ef þið viljið láta óánægju ykkar í ljós eða viljið sýna að ykkur standi ekki á sama, mætið þá á pallana á mrogun eða sendið tölvupósta, hrngið eða faxið í borgarfulltrúa áður til að láta skoðun ykkar í ljós.  

 


Næsta síða »

Um bloggið

AK-72

Höfundur

AK-72
AK-72
Með óþrjótandi áhuga á kvikmyndum, sögu og stjórnmálum.Telur sig hafa fullt frelsi til að hrósa og gagnrýna hvern sem er og hvenær sem er.
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • ...1212_913482
  • ...ner1_568492
  • ...rad-banner1
  • Screenshot

Heimsóknir

Flettingar

  • Í dag (19.3.): 0
  • Sl. sólarhring:
  • Sl. viku: 1
  • Frá upphafi: 0

Annað

  • Innlit í dag: 0
  • Innlit sl. viku: 1
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband