Opið bréf til borgarfulltrúa vegna Magma-samnings

Eftirfarandi bréf var sent á alla borgarfulltrúa:

"Til borgarfulltrúa allra þó þessu sé sérstaklega beint til borgarfulltrúa meirihlutans,

Nú verður tekið fyrir á borgarstjórnarfundi mál sem er eitt hið mikilvægasta sem sést hefur í hugum margra. Á þessum fundi eruð þið nefnilega að taka þá ákvörðun um hvort þið ætlið að afhenda eigur almennings í hendur erlends skuggafyrirtækis sem enginn veit raunverulega hver á og rekið er af mönnum sem virðast eiga margt sameiginlegt með Gordon Gekko, þegar ráðgast er við herra Google.

Ég ætla því að reyna að höfða til skynsemi ykkar allra í þeirri von að flokksgleraugu verði lögð til hliðar og hugsað verði umi, ekki bara hagsmuni Reykvíkingana  sem greiða ykkur launin heldur þjóðarinnar allrar . Ég ætla því að benda ykkur á nokkur atriði samningsins til umhugsunar:

• Magma notar eignalaust skúffufyrirtæki fyrir viðskiptin. Það er ákveðin vísbending um 2007 hugsunarhátt ósvífinna og samviskulausra þrjóta viðskiptalífsins og við hverju má búast.

• Engar raunverulegar eignir eru fyrir þessum viðskiptum, aðeins veð í hlutabréfum og hrunið hefur kennt flestum Íslendingum að slíkt er jafn nothæft og að nota sandpappír í stað skeinispappírs. 

• Samningurinn inniheldur í sér vexti upp á 1,5% af kúluláni til 7 ára. Bandaríkin sem fá hæstu lánshæfiseinkunn fá samkvæmt Bloomberg, best 3% lán. Þetta bendir augljóslega til að þetta sé brunaútsala og verið sé að afhenda þetta fyrirtæki sem ekkert er vitað um, gerir þetta enn vafasamra.

• Á sama tíma er verið að greiða 4,5% vexti af láni vegna kaupa á sömu hlutabréfum og það verðtryggt.

• Ákveðinn blekkingarleikur er settur fram með verðið þar sem lánið er í dollurum en er reiknað yfir í krónur. Miðað við það sem komið hefur fram þá má reikna með að ef og í raun þegar krónan hækkar, þá muni enn minna koma til almennings en reynt er að halda fram. Gengisáhættan og óljóst hjal um álverðstengingu að hluta gefur enga skýra mynd, heldur vekur upp einstakan vafa um ábata.

• Samkvæmt útreikningum sem ég hef undir höndum og fleiri hafa séð frá hlutlausum aðila, þá er tap OR af þessum samning 9,4 milljarðar sem er ívið hærri tölur en kom fram hjá Samfylkingunni. Það fellur allt á almenning í raun því OR þarf að hækka verð til að ná því tapi inn og nóg skuldar OR fyrir þó þetta fé bætist ekki við. Hverjir borga svo það tap? Ekki þið sem á okkur nærist, aðeins við sem tilheyrum þeim undirmálslýð sem þið teljið eingöngu mjólkurkýr og kallast almenningur.

• Með því að samþykkja þennan samning eruð þið meðsek í því að afhenda auðlindirnar í hendur einkaaðila í 65-130 ár, nokkuð sem þið hafið ekki siðferðislegan rétt að gera.

Nú veit ég ekki hvort verið sé að þrýsta á ykkur af áhrifamönnum úr viðskiptalífinu, hvort liðkað hafi verið með kaupunum með greiðslum undir borðum í reykfylltum bakherbergjum flokksklíkna eða hvort aðilar tengdir ykkur séuð að græða á þessu persónulega en eitt veit ég þó, að samningurinn er hroðalegur miðað við allt sem fram er komið. Þegar miðað er svo við atganginn og laumuspilið með kaup Magma frá upphafi, þá virðist þarna vera á ferð nýtt REI-mál miðað við að þarna sjást flestir af sömu leikendum eða verra. Sá orðrómur gengur nefnilega um að þið séuð í raun að fara að hleypa S-hóp, Bjarna Ármanns eða öðrum slíkum vörgum sem í raun standa á bak við Magma, til að rífa enn meiri sár á sálu þjóðarinnar og stefna framtíð hennar enn meir í átt til myrkurs vonleysis og kannski reglulegs rafmagnsleysis.

Slíkar gjörðir hafið þið ekkert vald til, það vald ber ykkur ekki því að auðlindir þjóðarinnar og nýtingarréttur er landsmanna allra að ákveða um. Það vald er ekki á færi smákónga sem hafa sett heilt sveitarfélag á hausinn eða stjórnmálaafla sem virðast ekkert hafa lært af REI-málum, hruninu og öðrum djöfulskap þeirra sem hafa aðeins aur í hjarta og blindaða af glýju gullgrafarans sem einskis svífst. Það er ekki heldur í valdi borgar-, bæjar- og sveitastjórna að taka svona afdrífaríkar ákvarðanir sem varða hagsmuni og lífsgæði komandi kynslóða í landinu án þess að um það ríki í samfélaginu þverpólitísk sátt og almennur vilji til þess. Ekki hefur ykkur verið veitt neitt slíkt umboð til þess af hálfu þjóðarinnar fyrir hrun og hvað þá eftir, ekki hefur ykkur verið veitt slíkt umboð til þess að vera með bruna-útsölur kortér í kosningar, ekkert umboð hafið þið til að taka svona ákvörðun án almennrar umræðu í samfélaginu.

Ég æski þess því að þið horfið ekki lengur á hlutina með flokksgleraugum lituðum hagsmunum klíkubræðra, heldur horfið og hugsið út frá því sem þið voruð ráðin til og hafnið þessum samning. Ef þetta sé svona glæstur samningur þá skuluð þið bjóða ríkinu að kaupa þetta á sömu kjörum eða það sem best væri að einfaldlega gefa Reykvíkingum eða landsmönnum öllum hlut í HS Orku svo það haldist í almannaeign. Fyrir slíkt geta margir þolað smá hækkun á rafmagnsverði, vitandi það að það fé fer til samfélagsins en ekki misjafnra manna af því tagi sem sett hafa þjóðina á hausinn.

 Ef skynsemin til að segja nei við þessum samning, er ekki á færi ykkar þá skuluð þið líta á þetta sem uppsagnarbréf um leið því ekki vill ég hafa slíka starfsmenn á launum, starfsmenn sem hugsa ekki um hag minn heldur gefa eigur minna og annarra með stórfelldum skaða fyrir alla eigendur. Ég vænti þess svo að þið látið ykkur þá hverfa í gleymsku sögunnar ásamt þeim viðeigandi minnisvarða sem ritaður verður í þessum dúr:"Engin verk gjörðu þau af viti heldur létu af hendi í misyndismanna veski, það eina sem þau ekki máttu: framtíðina og vonina sem í auðlindunum fólst."

Kveðja,

Agnar Kr. Þorsteinsson

P.S. Það skal tekið fram að ef svör berast þá verða þau birt opinberlega en eina gilda svarið í raun, er NEI við Magma-samning þriðjudaginn 15. september."

 Smá beiðni til allra sem vettlingi geta valdið. Ef þið viljið láta óánægju ykkar í ljós eða viljið sýna að ykkur standi ekki á sama, mætið þá á pallana á mrogun eða sendið tölvupósta, hrngið eða faxið í borgarfulltrúa áður til að láta skoðun ykkar í ljós.  

 

Athugasemdir

[Árni Karl Ellertsson (IP-tala skráð) 14.9.2009 kl. 22:30]

Mæta á pallana með eggjabakkana og gríta helvítins pakkið draga það síðan út og henda í tjörnina.Kannski að pakkið vakni þá til veruleikans og átti sig á því að fólk er komið með upp í háls af spillingu.

[Einar Björn Bjarnason, 14.9.2009 kl. 22:35]

Ég ætla að velta aðeins upp einum þætti, en þ.e. sagt að gengistap geti skapast, ef krónan hækkar verulega, þ.e. af tilteknu láni.

Aftur á móti, velti ég fyrir mér, af hverju einhver reiknar með því að krónan hækki.

Athugaðu, að ég er ekki að setja upp einhvers konar, stuðningsyfirlísingu hér um þennan samning, einfaldlega að velta fyrir mér, hvort tiltekin röksemd haldi vatni.

En, ef fólk enn man eftir Icesave umræðunni, þá muna menn að við stöndum frammi fyrir frekar háum vegg af skuldum.

Ein af áhrifum skulda, er að draga úr tiltrú á tiltekið hagkerfi, sem getur haft neikvæð áhrif á gengi gjaldmiðils.

Einnig, að ef leitast er til við að greiða, með þeirri aðferð að millifæra krónur yfir í erlendan gjaldmiðil, og svo prenta krónur á móti, þá hefur það einnig áhrif til lækkunar.

Þannig séð, eins og ég sagði. af hverju reiknar nokkur maður með, að krónan hækki, og þannig að það séu líkur á gengistapi? Að sjálfsögðu, skiptir máli, hver er líkleg þróun hagkerfisins.

-----------------------------

Síðan er það að sjálfsögðu, algerlega sjálfstætt atriði, að vera í prinsippinu á móti því að selja afnota rétt á auðlindum til útlendinga.

Ég tek fram, að ég er andvígur því að láta einka-aðila reka almanna þjónustu kerfi, eins og hitaveitu, og einnig rafmagnsveitu, því ég er fullkomlega sammála Stiglitz um að einka-aðilar séu ekki neitt sjálfvirkt skilvirkari en ríkið.

Að mínu mati er það samkeppni, sem skapar hagkvæmni, með þeim hætti að óhagkvæm fyrirtæki lenda hundir, sbr. "survival of the fittest".

Þetta þýðir, að ég hef alltaf verið sterklega skeptískur á hagkvæmni þess að einkavæða, þ.s. er í eðli sínu einokunar ástand og einnig, þ.s. er í eðli sínu hluti af hagkerfinu, þ.s. mjög flókið er að framkalla samkeppni.

Svo að ég er ekki neinn stuðningsmaður þessa tiltekna samnings.

En, ég vil hafa rétt, þannig séð, rétt.

--------------------------------------

Annars, er ég ekki svo viss, að þessi tiltekni samningur, sé svo stórt atriði, þ.s. ef bankarnir komast í eigu kröfuhafa, eins og ríkisstjórnin vonast eftir, þá eignast erlendir aðilar þá um leið töluvert stærri hlut en þennan tiltekna, í því félagi sem OR er þarna að selja sinn hlut í.

Kv.

[Brjánn Guðjónsson, 15.9.2009 kl. 00:31]

smegma energy

[Lilja Skaftadóttir, 15.9.2009 kl. 00:46]

Takk fyrir að senda bréf til starfsmanna okkar. Vonandi fáum við svör.

Ég mæti.

[Jóna Kolbrún Garðarsdóttir, 15.9.2009 kl. 00:49]

Ég ætla að reyna að mæta á pallana á morgun.  Ekki veitir af, þessi sala ætti að vera stjórnarskrárbrot.  En það á ekki að búa til stjórnlagaþing alveg á næstunni.  Mér finnst það mikilvægasta málið á Íslandi í dag að stofna til stjórnlagaþings og fastsetja það í stjórnarskrá að auðlindir okkar Íslendinga verði alltaf í eigu okkar Íslendinga..  

[Elín Sigurðardóttir (IP-tala skráð) 15.9.2009 kl. 05:36]

Hjartanlega sammála þér Einar Björn. Áform ríkisstjórnarinnar fá furðu litla umfjöllun. Þöggun getur greinilega tekið á sig ýmsar myndir.

http://www.ruv.is/heim/frettir/frett/store64/item298316/